點題

我好易頭暈，地鐵埋站我唔可以正視，見到旺角、銅鑼灣的湧湧人頭亦係大忌，上網對得電腦耐都可能會暈，有時只係入CD舖打個白鴿轉都可以令我頭昏腦脹。總之只要我當日狀態唔好，就做咩都死，只有聽下柔和音樂，睇下閒書。

可能係我有病，又或都我身體本身就咁奇怪，好講狀態，狀態好時，可以飲好多酒都面不改容，但好多時係飲得4、5枝啤酒或8杯紅酒左右就開始好眼訓，嚮街又唔可以訓，死頂加上搭車搖兩搖就一定嘔，又或者在酒吧扒低訓一陣又係死，一醒O個下勁頭暈，必嘔。

有時唔係飲酒，記得好多年前，有一晚訓得兩個鐘起身，好辛苦、頭暈，無幾耐就嘔，之前無飲過酒，純粹因為頭暈而嘔。細個好易暈車浪，又住屯門，出親街都要搭長途巴士，一搭長途巴士就必定作嘔。試過有次搭巴士返屋企途中作嘔，坐我旁邊的一位阿婆竟然滴白花油入我個口，當時我係即刻唔再想嘔，但就記得好"拿"喉...... 大個左無咁嚴重，但都唔可以搭車時睇書、打機，只可以聽歌、瞓覺，連睇Roadshow都唔可以睇太耐。

諗起沙特的《嘔吐》，小說中的主角常無故嘔吐，後來他發現這是他對世界的無意義性的反應，一個空無意義的世界令佢嘔心。我的暈眩正正「相反」，完全是一個形而下的原因，
是我身體機能使我容易暈眩，再加上一個喧鬧紛擾的環境。