終於

今日玩動物之森，一日之內捉晒之前捉唔到的三條魚：Blue Marlin, Dorado 同 Char。我發現同D 動物比賽捉罕有魚期間特別容易捉到罕有的魚，唔知捉蟲係咪一樣。最搞笑係save 完之後load 番出來就見到鎮長，佢竟然話...求婚... 仲要面紅...


繼得到金剷之後，我終於拿到金魚杆，下一個目標係金水壼。今日我個鎮都發生好多事，朝早見到Tom Nook 用131蚊買白蘿蔔，「生平」第一次，另外又見到貓女，以前都好似見過，但就無帶佢返屋企，今次就帶左佢走，收到份禮物Music box。
玩動物之森都幾困身，尤其是種左紅蘿蔔唔可以轉時間，之前一個星期，為左睇住Tom Nook收白蘿蔔個價，每日都帶住部NDS返工，食晏時睇一次，放工再睇一次(我個鎮比香港時間慢三個鐘，現實上好似係巴基斯坦Karachi巿(GMT+5)的時間)。整整一個星期都低過我收入價，結果爛晒都無賣，拿出門口引蟻。

もぎたてチンクルのばら色ルッピーランド（任天堂）link
另外我又玩緊呢隻遊戲，直譯係「新星誕生汀格爾的薔薇色盧比樂園」亦有人譯做「35歲獨男之大冒險」。成隻GAME一隻漢字都無，完全唔知佢講乜，只可以靠估，或問下日文高手。成隻GAME的目標係搵錢，之後將D錢投入個井度，「餵大」佢，個井愈大，你就可以去愈遠的地方。最特別的地方係主人翁無傳統的HP 值，亦無武器/防具，你可以請僱佣兵，但當然要用錢，而錢亦同時係主人翁的HP... 如果身上無錢就會GAME OVER，你打怪獸時，無可避免一定會扣錢，睇下扣多定扣少，除非你次次都叫個僱佣兵出手(僱佣兵有HP，打怪獸時又係會扣，而且好似無得回復)，但實際上好難「叫」個僱佣兵打，因為佢只會跟你尾，你唔可以直接叫佢去攻擊怪獸。
另外，你同D村民打交道又係要用錢，買情報又要錢，條橋搭路又要錢，乜都要錢，而且佢地唔會話你知要畀幾多錢，佢地心中有個價，你畀多就會蝕，畀少就仲賤，錢佢照袋，o野又唔做，你係要出到佢個心水價先做，好彩我搵到個日文攻略(link)，否則我連Level 2都過唔到。
。要搵錢就要打怪獸，拾起佢地跌出來的物品，之後可以直接賣畀村民，又或者用幾種村料煲湯之後再賣，可以賣得貴D。但又唔可以花太多時間「練功」儲錢，因為個井會催你畀錢，而且好似時間愈耐愈要畀多D錢個井先可以升Level。

P.S. 剛睇過「獨身男」的說明書，原來係可以指示個僱佣兵攻擊怪物，同埋可以畀o野佢飲回復體力。