Tokyo II

諗極都諗唔到第二日晏晝食左乜，只係記得一早去Tower Records等佢十點鐘開門，買左幾隻碟，之後去Bic Camera，好多相機、鏡頭Display，我亦買左8筒菲林，以為會用到，結果係原封不動攞返香港。之後去西武樓下兜左個圈，買左兩個Dorayaki，之後等女友一點半集合，返酒店放低D 野，在酒店食左兩個豆沙餅，之後只係記得去左新宿，行高島屋、行Beams、同新星堂，另外又行左一陣Tokyu Hands，見到不少香港人睇Porter袋。

印象中阿蘇san在Tokyu Hands買左個木製的卡片座，之後玩腳部按摩機，玩到小腿有兩個印，之後大家就去左搵Map Camera，行錯路，搵唔到，原來只係在新宿西口Yodobashi附近，早知一早跟蘇san行，去到都差不多七點半，在Map Camera匆匆行左一陣，因為佢地要閂門。

去到Yodobashi，買幾件配件，被人點上點落，一時上五樓，上到佢又話要去二樓咁，買三件野要去三個不同樓層。之後去隔離館睇SCANNER，Epson GT-X900 (V700)真係平，39,990yen，當時問售貨員有無得送貨，但佢話唔送去酒店，由於我地未食飯，仲要行好遠所以無買。

食飯要行好遠，印象中最少行左十五分鐘，是在新宿站的另一邊，一間叫牛繁(後來先知係連鎖店)的炭火燒烤，都幾好食，同埋好少人。地址係新宿三丁目。



補記：當日無買到scanner，之後去池袋的Bic Camera睇，竟然賣48,xxx yen(但今日上佢個網查係賣39,980yen)，貴Yodobashi成九千yen，當然無買啦，之後的旅程亦無機會再去新宿。結果o係最後一日，Checkout之後，膽粗粗一條友由池袋仆去新宿，當時我唔記得問蘇san應該邊個出口出，只憑當晚的些微印象，加上睇地圖的大概位置，好彩地在西口出左，一過馬路行入一條街就係。價錢仲比上次平，只要36,900yen，退稅之後只要35,220yen，好抵。
不過，部Scanner好大部，成個盒有行李箱咁大個，無可能hand carry上機，而且好鬼重，我估有10KG以上，我由新宿攞去JR線上車，已經成身汗，在池袋落車之後仲要行15分鐘(因為我住Sunshine Prince)，真係XYZ@!。
而家諗番，我都算好彩，好彩蘇san無乜行李，三條友加埋寄倉先六十幾KG，過左少少磅但未需罰錢。另一個好彩就係我就咁成個盒寄倉，無另外加packing都無乜損傷，返到香港都用到。