呢排好黑仔，買幾件野都有問題。上星期一收到早前在ebay買的Retina IIa，開箱後檢查部機，發現枝鏡係Rodenstock Heligon，半驚半喜，喜係因為我本身有部IIIc係Schneider Xenon，多部唔同鏡頭的機，可以玩下比較；但另外我記得賣家個listing張相清楚見到係Schneider鏡，上網睇番亦確定係Schneider，咁即係話我收到的係另一部機，如果只係咁我無所謂，甚至覺得有賺，但睇清楚D發現機背觀景窗旁有一行刻上去的號碼，成部機即時大打折扣。賣家對部機的描述係"EXCELLENT CONDITION OVERALL WITH SOME COSMETIC WEAR TO BLACK FINISH"但無講過觀景窗旁的刻字，加上鏡頭亦唔同，明顯同佢所講的有出入。我即時發email同佢講，睇下佢會點答。點知佢竟然話我換左部機想呃佢退錢，真係激到我死，之後仲接連send多兩個email鬧我同恐嚇我。我之後向ebay求助，佢叫我去Paypal 做一個"open a dispute"的程序，但我睇黎睇去，最多只係退錢，而且佢可能要我將部機寄畀Paypal或第三方做公證人，咁做當然合理但就唔實際，我計過度過，部機連郵費只係畀左400蚊，如果再寄可能要200，而且要搞一輪，我最怕煩(諗起鹿丸)，所以都係「制」唔過，唯有食死貓，被賣家屈我意圖騙財。真背(普通話)。
第二單又係相機野，在YAHOO 拍賣標投到一枝FD 50 f/1.4 SSC 鏡，賣家話有90-95%新，今日交收，當時已發現光圈葉有油，但不嚴重，背光下睇鏡除了有一點似是霉或鍍膜有損，之外問題唔大，諗住始終係老鏡，我照畀錢($388)，但畀錢前當面向佢指出呢兩處毛病，但佢堅持o個一點只係塵，仲爆響口話指佢自己開過黎抹，最多係砌返時入塵。但返到屋企，搵電筒一照先發現有幾個清潔鏡片時留低的「控」，似乎之前曾經發霉，而且頗為嚴重。我買過唔少二手鏡，今次係最差。由於交收時無發現，只有認黑仔，唯有當買左枝cork左ke酒。真背。其實而家唔少人在yahoo賣相機野，我估大部份係在鴨寮街的二手相機攤買黎翻新後出售圖利，所以買呢D要盡量小心，諗下諗下以後買鏡都要自備電筒。
第三單係對上兩個星期六，屋企用開的Buffalo WBR2-G54 router突然神左，攞唔到IP，兩個月前轉用DD-WRT的firmware (v23 sp2)，一直都無問題，出事後試過flash 個最新的v24，都唔得。諗住係硬件毛病，星期一出去買個新，屬意Asus WL-500W，有draft n同USB，點知旺電幾間都無貨，由於急用，就買左個Buffalo WZR2-G300N，返到屋企SETUP好後，發現download speed得3-5kb!!!但upload正常，幾十kb。搞左成晚,upgrade埋firmware都唔得(最新的個firmware都已經係半年前)，之後搞下個舊router，之前聽同事講有個叫Tomato的firmware，原來都啱用，就試下用，估唔到用左Tomato就即刻無事翻生。即係新買的router唔止唔啱用，而且根本係唔需要用。為左搵出問題的原因，我試下用舊router駁modem攞到ip後派個192.168 ip畀新router，再由新router再派另一組ip(當然係唔同subnet)畀電腦，發現一切正常，download有400kb，似乎並非硬件問題，可能係個router同modem唔夾，但我諗唔到點解router同modem有夾唔夾的問題。
第二日攞個router去換，點知換左返黎都一樣，無分別，諗住間舖都唔會再幫我換，星期三下晝(上晝八號風球)打電話問漢科，個職員叫我拎上去畀佢地睇，如果真係有問題會退錢。我星期六拎上去，佢試畀我睇時用PPPoE竟然無事，好正常，似乎個問題真係同我個modem唔夾，唔係router的機件有事，心諗今次慘啦，蝕錢之餘仲要得物無所用。哈，估唔到漢科好好，佢話「為左保障客戶利益」，所以退錢畀我，係現金而唔係換第二件貨，實在令我喜出望外，值得一讚。來來回回蝕了不少時間同車錢，但賺了少許經驗，算是不幸中的大幸。
