快碼 OS X

最近有朋友轉用Mac機，但發現無得用快碼，而佢又唔想重新學倉頡，苦惱左一段時間。諗過幾個方案，一、手寫輸入，可惜蒙恬唔再出Mac OS X 用的手寫板，雖然可以買塊Wacom板再配蒙恬 for Mac 5.5 黎用，但只支援Power PC，新的Intel Mac 用唔到，況且要搵番套蒙恬for Mac 5.5一D都唔易。二、語音輸入，好多年前Apple 新加坡分公司開發左一套叫「神筆天韻」的中文語音暨筆式輸入軟件，但只可以在OS 9上用，在OS X就要開Classic先用到，而且呢套軟件又係絕版多年，想搵都無，即使畀你搵到，有時為左打幾隻字而要開Classic，始終唔方便。我地亦有諗過用住廣東話(粵音)輸入法先，但最終無用到。順帶一提，有一個叫chinese mac的網頁，詳細介紹好多mac 機上的中文輸入法，值得一睇。

開發快碼的公司已經表明唔會為OS X開發快碼輸入，而Windows XP版的第七代快碼之後亦再無更新。但隨著OpenVanilla 同歪林 呢類外掛輸入法的出現，開始有人自製快碼字碼表，並成功造左一個畀歪林用的Unicode字碼表 (link)。可惜歪林只有XP及Linux版，OS X不能用，OS X一定要用OpenVanilla，但看過OpenVanilla的字碼表格式後，我發現可以將歪林那個快碼字碼表改動一下搬到OpenVanilla用。

我開頭以為好易，就番Ｄ格式，點知一開始連一個字都打唔到、連字根都顯示唔到，後來多番嘗試，將個字碼表減到得2個字，又將原本倉頡(cj.cin)的字根搬來試，仲寫埋個Script方便我在Terminal抄個file 去 /Library/OpenVanilla/0.7.2/Modules/OVIMGeneric/，Logout - Login了不下十次後發現左一個奇怪的小問題，或者應該咁講，係我無意中解決左呢個問題之後先發現到問題所在。

在字根欄內，我用TextEdit，將Cursor放在一行的最前，然後按delete，將整行縮去上一行，然後按Return開新行，即係原本個字根表係分二行：

a 人
b 耳
c 成

（圖一）

我就在"b 耳"前面按delete，變成：

a 人b 耳
c 成

（圖二）

之後再按Return(Enter)，變成：

a 人
b 耳
c 成

（圖三）

就咁睇似乎我完全無做過任何野，圖一同圖三完全一樣，原地踏步，但事實上當我將所有字根以及兩個實驗用的字碼都照版煮碗做一次之後，真係可以用到，打到字，我當時都唔知點解，而家個問題係，一個完整的字碼表保守估計都有成3000字，就算每日機械咁改300行，都要用10日先完成。不過，最起碼我呢刻知道實際上可以做到一個OpenVanilla的快碼，只係需要時間同工夫去完成。我第二日就一邊睇電視，一邊好機械咁改左差不多四分一(用左最少兩個鐘)。其實當時所有未做"Delete-Return"改動的字碼都可以打到出黎，但出黎之後會自動跳行/換行，極唔方便。

我有試過用Office for Mac的Word開，睇唔出我呢個"Delete-Return"的改動前後有乜分別，之後我用Windows 的Word 2003開，都睇唔到分別，但Save 的時候佢彈個對話盒出來：



見到「行尾字元：CR/LF」就隱約覺得有轉機，我選左LF ONLY，之後拿去試，Bingo! 所有字碼都正常，唔會有跳行。原來問題的癥結就係呢個LF/CR的分別。由於歷史的原因，電腦有多過一種"符號"去指示開新行(newline)，詳情可以睇Wikipedia中Newline一項。歸納以上的種種現象，似乎OpenVanilla會認CR做開新一行，而歪林的快碼表入邊分隔字碼的是CR，所以有跳行的情況，OpenVanilla字碼表中字碼分隔因而不可用CR，只可用LF。另一方面，TextEdit係不論CR或LF都會顯示為開新行，而在TextEdit入邊按Return只係出LF，所以我上面所講的"Delete-Return"程序其實就係將每一行的CR改成LF。

廢話講完，下邊有條link畀大家下載個cin檔，如果大家發現有乜問題，請告知。Oh, 差D唔記得講，由於快碼字根包括1234567890，所以選字鍵我改為!@#$%^&*()，即係Shift + 1234567890。大家的鍵盤配置可能唔同，download 後或者要改改%selkey一欄，有關更改字碼表(輸入法表格)的方法可參考OpenVanilla.org入邊的「如何自訂輸入法，以及，如何修改現有的輸入法表格」

下載Qcode.cin，由於我唔識將file upload上Blogger，而自己又無地方放，所以放住O係Sendspace，download係會麻煩少少，希望遲D有人可以將個file upload去一個固定的server。

P.S. (27mar2007) Sendspace 條link斷左，有位有心人放左上sharebigfile，http://www.sharebigfile.com/file/113376/qcode-cin.html